السلام عليكم ورحمة الله وبركاته
زي ما ععودناكم ندخل بالموضوع على طول لاني ما اعرف اسوي مقدمات بصراحه
لكن سبق ووعتكم في اعلان سابق اني ساضع لكم موضوع عن كلتش المروحه او معنى اخر تماتيك المروحه.
انا حخصص الموضوع ده الفرق بين انواع المراوح عشان كل واحد يعرف نوع مروحه سيارته والموضوع القادم خلص لكلتش المروحه
المراوح نوعين مكانيكيه وكهربائية مروحه مكانيكيه وتجي فيها كلتش مروحه اللي حنشرحه بالموضوع القادم وتكون غالباً مثبته باربع مسامير على طرمبة الماء وطربمة الماء مثبته في المكينه وتدور مع دوره المكينه بواسطة السير
ونفهم من ذلك ان المروحه المكانيكيه تبقى شغاله على طول مع دوره المكينه..؟ ايه صح تبقى شغاله مع المكينه لكن بدرجات مشروحة في الموضوع القادم (الا مع السرعات العاليه ازود من 150/كم بالساعه)
صورة للمروحه المكانيكيه
دي مروحه سيارتي طبعاً كابرس 88
في منها نوعين وهيا حديد او بلاستيك مقوى
غالبا تكون حديد في السيارات 8 سلندر والامريكي الالماني
وتكون بلاستيك في باقي الانواع
وكل نوع له مميزرات وعيوب
الحديد يكون اقوى عند تعرضها لاي شي بالغلط سواء مفلك او لا قدر الله دخلت السياره في السيل طبعاً الحديد حيكون مقاوم وبطيء في الكسر وعيبها وزنها ثقيل اما البلاستيك عكس ذلك تماما ومميزة البلاستيك وزنها اخف وطبعاً يوجد منها احجام وانواع وفي منهم في 4 شفرات وفي 5 إلى 12 شفره وكل وحده لها كفائة تبريد بحسب الشفرات
هل في سياره فيها اكثر من مروحه ..؟لاء مافي في بعض السيارات يكون مروحه مكانيكيه واحده وفي بعضهم يعتمدو على المراوح الكهربائية بدون مكانيكيه بس اكثر من مروحه مكانيكيه مافي
نجي للمرواح الكهربائية وهذه صورتها
اغلب السيارات الحديثه يعتمدو عليها وتكون ثابته على نفس قاعدة الرديتر وتمد طاقتها من الكهرباء وفي منها مقاسات وانواع واشكال وعدد شفرات لكن كلها بلاستيك ومافي حديد
المراوح الكهرباء نوعين 1- سرعتين 2- سرعه وحده السرعتين تكون المروحه لها سرعتين تكون السرعه الاولى مع تشغيل السياره او وقت ارتفاع درجه الحراره لدرجه معينه تشتغل السرعه الاولى والسرعه الثانيه وقت ما ترتفع درجه الحراره لاكثر من الطبيعي بشيء غير ملحوظ بو وتشتغل بواسطة حساس وتبرد الرديتر وترجع تطفي السرعه الثانيه اخترعو الطريقه دي لسسبين لأرتفاع صوت المروحه عند السرعه الثانيه ويصير مزعج وللمحافظة على كهرباء السياره
سرعة وحده وتكون سرعتها متوسطه وتتم عمل تبريد للرديتر بشكل ابطأ وفي بعض انواع السيارات موجود فيها مروحتين سرعه وحده وحده تكون شغاله والثانيه تشتغل مع ارتفاع الحراره بدل من السرعه الثانيه
وبعض السيارات اللي يكون الاحتراق حقها عالي وحرارتها عاليه يحطو مروحتين وبسرعتين
هل يمكن تركيب اكثر من مروحه كهربائية في السياره...؟ايه نعم تقدر في بعض السيارات من بلدها يكون فيها مروحتين وفي بعضها مروحه وحده ويركبو لها مروحه ثانيه عشان حرارة الجو عندنا في السعودية
هل في سيارات يوجد فيها مروحه مكانيكيه وكهربائية ..؟ايه مظبوط في بعض انواع السيارات يكون اعتمادهم على مروحه مكانيكيه ومروحه اضافيه كهربائية وبعض الأشخاص يركبو مروحه اضافيه كهربائية مع المكانيكيه لزيادة التبريد وفي بعض السيارات يكون نسبة احتراق زيتها عالي مثل الالماني (المرسيدس) يكون فيه مروحه مكانيكيه ومروحتين بسرعتين كهربائية غير ثلاجه المكينه طبعاً
(ألي يسأل عن الثلاجه مطولين على شرحها يبالها موضعين بحالها)بعض المراوح السرعتين تكون شغاله السرعه الثانيه مع تشغيل المكيف وهذا افضل
اي افضل المراوح الكهربائية ام المكانيكيه (هذا السؤال الكثير يسأل عنه)حأحط لكم عيوب ومميزات وابغى كل واحد يكتبلي اش فهم منها وايت الافضل
المرحة المكانيكيه :
عيوبها:1-تصدر صوت عالي جدا عند ارتفاع حرارة محرك السياره
2- تسبب ثقل في المكينه سبق وذكرنا انها تتثبت على الطرمه وتلف مع السير مع لفه عامود المكينه وبهذه الطريقه ردة فعل الهواء للمروحه يسبب ثقل وبدونها يكون عزم المكينه اقوى
مميزاتها1- عمرها اطول من الكهربائيه بكثير وممكن ان تدوم معاك لاكثر من 35 سنه (ما بأقصد على الكلتش على المروحه نفسها)
2- لا تسبب اي ضرر على الكهرباء ولا تستعمل حاجه اسمها كهرباء
3- قوة تحملها عالي ولا تتأثر عند ارتفاع درجه الحراره إلى الاتش (H) لفتره طويله لانها حديد
4- تتوقف عند السرعات العاليه وأللي هيا فوق 150 ويبقى الرديتر يعتمد على الهواء الخارجي الداخل من الخارج للرديتر
المروحة الكهربائية عيوبها:1- تأخذ جهد كهربائي من السياره ويصل من 4 إلى 7 فولت علماً ان كهربة السياره من 12 إلى 14 فولت
2- عمرها قصير وتحتاج لتبديل كل 6 إلى 7 سنوات طبعاً على حسب الاستعمال
3-وعند ارتفاع درجه حرارة السياره للاتش (H) لفتره طويلة حتلاقي احد شفراتها بدأ في الذوبان
4- لا تتوقف عند السرعات العاليه فوق 150 وتبقى شغاله وبالتالي حيكون قوة الهواء اللي قادم من الشبك قادر على انه يوقف شفراتها وبعض المراوح توقف شفراتها ويبقى الدنمو الخاص فيها يعمل وبالتالي تسبب في حرق الدنمو لفتره طويلة (طبعاً ده الشي عالجوه في تغير شكل شفرات المروحه وصارت تزيد سرعة المروحه على السرعه العاليه بسبب الهواء)
مميزاتها:1-لا تسبب ثقل بالماكينه
2- تكون صوتها اخف من المكانيكيه وحتى عند تشغيل السرعه الثانيه
عرفتو المميزرات والعيوب ابغى كل واحد يكتب اي مروحه يفضل والسبب ملاحظات مهمه ومفيده في بعض السيارات يكون فيها مروحه مكانيكيه ومافيها كهربائية والمكانيكيه تكون ورا الرديتر (رديتر المكينه) بعض الشباب يركب كهربائية ويخلها مع المكيف لانها تكون امام الرديتر وتكون اقرب إلى (رديتر المكيف) عشان تعطيه مكيف ابرد (انا مسويها بسياراتي)
صورة توضح مكان المروحة المكانيكية
خلصنا واخيراً
ترقبو موضوع الكلتش وطريقة تصليحه وشرحه مفصل كان ودي اكمل الموضوع هنا واشرح الكلتش لاكن خليني اجيب لكم صور
ترا تعبت بكتابة الموضوع ساعه ونص عليه
وابغى من كل واحد قرا الموضوع يروح سيارته ويشوف اش نوع المروحه اللي راكبه عنده ويجي يقلنا نوع سيارته وموديلها ونوع المروحه عشان نعرف فهمتو ولا تعبت عالفاضي [color:436a=red]دعواتكم